Madelie Human demonstreer met haar nuutste Romanza, Tydloos, presies hoe goed versoenbaar fantasie en romanse is. Romanses se uitstaande kenmerk is hoeka dat dit vir die leser ontvlugting bied van die daaglikse sleur. Die storie van Juli le Roux kom met ’n bonus: ’n tydsprong drie honderd jaar in die verlede in.

Op innoverende wyse trek die skrywer ’n korrelasie tussen die tyd van slawearbeid, rokke met laag op laag valle en kant en ’n persoonlike diensmeisie, en Juli se moderne leefstyl, kleredrag en tegnologie wat sy agterlaat in een-en-twintigste eeu. Vir Louis Rousseau, die verloofde wat sy in haar nuwe wêreld ontmoet, is hierdie nuwe, vurige Juliette ’n openbaring en ’n uitdaging.

Mens moet nogal mooi kophou om die kloutjie by die oortjie te hou met tye en geslagte, en ek haal my hoed af vir die skrywer wat dit alles moes bedink en logies neerpen. Madelie Human is gelukkig ’n gesoute skrywer en skroom nie vir ’n uitdaging nie. Ek het heerlik gelees aan Tydloos, hoewel ek nie ’n gereelde fantasie leser is nie. Dit verdien na my mening volpunte.

Koop die gedrukte boek hier

Koop die E-boek hier