Die probleem met probleme

My eerste indruk van die boek is dat dit kleurvol is. Dit is prettig geïllustreer met genoeg detail om die kinders aan te moedig om die “Probleme”, wat glo gediertes is, uit te snuffel en te identifiseer. Meer nog, daar is raad oor hoe om van die probleme ontslae te raak.

Die lettertipe is kindervriendelik, sodat nuwe lesers dit met gemak sal kan baasraak. Soos met baie van die pragtige kinderboeke wat daar deesdae gepubliseer word, is die bladsye duursaam en semi-glans, hoewel nie bestand teen ‘n baba boetie of sussie se aanslag nie. Gawe geleentheid vir die ouers om kinders te leer om met sorg met boeke om te gaan sodat “probleme” dit nie kan verniel nie.

Die boek van Rachel Rooney en Zehra Hicks is in Afrikaans vertaal deur Nandi Lessing-Venter en deur Lapa uitgegee.

Koop hier

 

 

 

Weet hoe met wetenskap

Aandag: alle ouers met ’n liefde vir wetenskap, wiskunde, tegnologie en ingenieurswese. ’n Lywige boek propvol modelle en projekte, nommerpas om aan te pak saam met julle leergierige kinders. En ideaal om die grendeltyd sinvol in te kleur.

In die voorwoord maak die skrywer, Robert Winston, die interessante stelling dat mislukking belangrik is, want jy leer uit foute en verbeter met die herbou van modelle. Klink na goeie aanmoediging om die redelik uitdagende bouprojekte aan te durf. Die projekte is netjies verdeel in kleurgekodeerde afdelings soos kragte en beweging, vloeistowwe en reaksies, en lig en klank, om maar ’n paar te noem.

Elke eksperiment of model word stapsgewys aan die hand van beskrywing en duidelike kleurfoto’s verduidelik. Dan volg Toets en verstel, ’n verduideliking van hoe dit werk, en toepassing in die “Regte wêreld”.

Die ideale ouderdom is 9+, maar sommige van die projekte kan met die regte hulp van ouers selfs deur jonger kinders geniet word.

Die oorspronklike Engels is in Afrikaans vertaal deur Linda Roos, en word uitgegee deur Lapa. Koop hier by Lapa

 

Mia, soos ’n herfsblaar…

“Soos ’n herfsblaar, so lig is sy. Later dwarrel sy lig deur die wind, op pad na ’n nuwe bestemming.” So skryf Colette du Plessis oor klein Mia in die voorwoord van die hartroerende storie deur ma, Mariska Robberts.

Dit is ’n boek wat ek moes klaar lees en laat insink, alvorens ek iets daaroor kon skryf. Die pad wat Mariska en haar familie moes stap sedert die fatale dag op die Bottelarypad by Stellenbosch, was moeiliker as enigiets wat ek nog in my lewe moes doen, daarvan is ek oortuig. Alles sou eers baie erger raak, voordat daar genesing kon kom. Haar woorde  op bl. 36 vat dit raak: “Min het ek geweet dat daardie eerste golwe van trane maar nog net laagwater was.”

Mariska se genesing was ’n lang proses waartydens sy haar emosies, haar pyn en herinneringe neergeskryf het. Haar grootste troos het sy gevind in haar binnekamer, waar sy intense belewenisse gehad het en die teenwoordigheid van Jesus en van Mia ervaar het. As leser leer ek iets belangrik daaruit: skryf jou seer uit jou lyf uit, want dit mag later vir jouself, of vir iemand anders, van waarde wees. Ek wil glo dat in die regte hande, hierdie boek van groot genesende waarde kan wees omdat die hoop nie beskaam nie en die lig uiteindelik weer deurbreek.

’n Belangrike pluspunt is die slothoofstuk deur Braam Klopper, bekende predikant en pastorale terapeut. Hy rig dit spesifiek aan ouers wat kinders verloor het, en waarsku teen slaggate, soos om jou huwelik en jou ander kinders se behoeftes agterweë te laat. Beide Braam Klopper en die skrywer self, het dit oor die sinnelose uitlatings wat welwillende mense dikwels maak, soos dat God sy mooiste blom kom pluk het.

As jy die gestel het om saam met ’n ma deur intense pyn en verlies te stap, lees gerus hierdie buitengewone verhaal van verlies en hoop.

Graffiti Boeke bied dit tans aan teen ’n goeie prys.

Stories van Magriet

Dit is ’n bewese feit dat die waarheid gewoonlik beter is as fiksie. Dit is waarskynlik waarom die nuwe reeks boekies oor ’n troetelhoender genaamd, Magriet, so oulik is. Luidens die persverklaring, is dit gebaseer op ware avonture van die skrywer, Melanie Tait, se dogter en haar twee hoenders.

In Magriet die stadshoender, kry Nina ’n kartondoos op haar verjaarsdag, waaruit vreemde pik geluide kom. ’n Wit hen spring uit, een wat elke dag ’n eier gaan lê. Toe die eerste eier verdwyn, volg ’n wye soektog wat eindig in die kombuis.

Magriet hou konsert is die tweede titel. Die voorgenome konsert is in gedrang, want Magriet het haar kekkel verloor. Heuning en gemmerwortel word ingespan as kuur.

Die illustrasies deur Linki Brand is besonder mooi en kleurvol en sal bepaald die kinders se aandag boei. As bonus het elke boek ‘n resep vir ’n lekker eiergereg wat die kleintjies kan maak met hulp van ’n volwassene.

Beide boeke is as papierboeke sowel as E-Boeke te kry. Volg die skakels hier onder om direk by Lapa te bestel.

Magriet die stadshoeder E-Boek
Magriet hou konsert Papierboek

Magriet hou konsert E-Boek

Alles oor kos en kook, vir alle ouderdomme

In die huidige uitdagende tyd waar gesinne grotendeels moet sorg dat kinders tuis vermaak word, is ek opgewonde om te sien dat die ou, en immergewilde Klein kook en geniet weereens op die rakke is. Vir ’n boek om, in 2020, die tweede druk van die vyfde, volledig hersiene uitgawe te beleef, is voorwaar ’n uitsonderlike prestasie.

Die kleursketse van die oorspronklike uitgawe is vervang met pragfoto’s en die bladsye is semi-verglans en lekker duursaam. Selfs die minder ambisieuse onder ons, gaan lus kry vir kosmaak by aanskoue van die heerlike geregte. Die unieke waarde van hierdie boek lê daarin dat kosmaakmetodes stapsgewys aan die hand van duidelike foto’s verduidelik word. Dit lê die basis daarvoor om later enige resep met sukses te kan volg.

Daar word afgeskop met praktiese wenke vir die veilige en higiëniese gebruik van die kombuis, die verskillende kossoorte, asook die mees algemene kombuisgereedskap wat ’n nuwe kok moet ken. Verskillende metodes, soos klits, klop, knie, stowe en vlok, word met foto’s uitgebeeld. By elke resep, wat in afdelings gegroepeer word, word gelys presies wat die kind moet uithaal alvorens hy of sy begin.

Gemeet aan die foto’s, is die resepte uitstaande. Ou gunstelinge soos pannekoek en plaatkoekies tot dekadente koekstruif en suurlemoenblokkies. Gesonde opsies is ook volop, soos slaaie en ’n verskeidenheid vleisgeregte. Lyk bepaald aanloklik genoeg om self te probeer.

Klein kook en geniet word uitgegee deur Human & Rousseau, en is beskikbaar by goeie boekwinkels. Kry dit by Graffiti boeke teen ’n gawe afslagprys.

 

 

Prettige klein boeke

’n Nuwe reeks klein boekies deur Fanie Viljoen, is gemik daarop om bepaalde emosies uit te lok, soos op die kleurvolle buiteblaaie aangedui. Die boekies mag klein wees, maar dit is propvol inligting en baie oulike illustrasies deur die skrywer. Elke boekie sluit af met ’n klompie vrae oor die inhoud, waarna die lesertjie ‘n toepaslike sertifikaat verwerf, wat formeel deur die ouer of voorleser geteken en gedateer kan word.

Die klein boek van Reuserekords spring weg met ’n waarskuwing dat slegs sekere rekords self aangepak kan word, want baie is supergevaarlik. Rekords soos ’n konfytbottel van 559,8 kilogram en ’n sosatie van 194,5 meter verdien ’n “Sjoe!”

Oor die Fantastiese Feite kan mens bepaald “Wow!” sê. Daar is heelparty feite wat mens nie moet lees as jy maklik naar word nie, en ’n paar grappige feite om balans te behou.

Ek frons effens oor die klein boek van Katastrofiese Kattekwaad, want persoonlik hou ek nie van poetse bak nie. Om iemand te laat dink dat jy ’n vlieg eet, is bepaald “Jig!” Aanhoudende poetse kan maklik veroorsaak dat ’n kind as ’n boelie gebrandmerk word, waarteen die skrywer gelukkig waarsku. Ouers moet liefs die nadele van sekere poetse goed by die kinders inskerp en die poetse onder toesig laat geskied.

Die klein boek van Gruwelike Geheime is nogal baie interessant met uiteenlopende gespiegelings soos dié oor die bekende glimlag van Mona Lisa en Egiptiese hiërogliewe waaroor daar “Sjuut!” gesê word.

Alle bronne vir die wye verskeidenheid van feite, word gelys aan die einde van die boekies. Ouers en kinders sal vir ’n geruime tyd met die boekies kan besig bly, en die ouers mag self ’n paar interessante dinge leer.

Die reeks is as bekostigbare papierboeke of E-Boeke beskikbaar by Lapa. Volg gerus die onderstaande skakels vir die papierboeke

Gruwelike geheime

Katastrofiese Kattekwaad

Reuserekords

Fantastiese feite

 

 

Eisteddfod-pret 2

Ek is weliswaar nie meer in voeling met skoolkonserte en kunswedstryde nie, maar ek herken ’n wonderlike hulpmiddel as ek dit sien. Ek praat van die tweede Eisteddfod-pret boek wat onlangs verskyn het. Dit is saamgestel deur Gloudine Kellerman en Jonelle du Toit, met baie oulike en gepasde illustrasies deur Tumi K. Steyn.

108 Gedigte, 24 monoloë en 20 samesprake is gekies vir kinders van gr. R tot gr. 7. Soveel as agttien outeurs se nuwe werk is in die bundel opgeneem. Dit is handig gerangskik vanaf kort na lank en die aanslag is modern, met lekker titels soos YouTube-oomblikke en Tjoklitkoek op die tegno-manier. Ou bekendes is ook daar, soos Hasie en Skilpad wat weer resies hou. Ek wil glo dat hierdie bundel die wêreld oneindig makliker gaan maak vir ouers en opvoeders wat kinders moet afrig, maar dikwels self geen opleiding gehad het nie. Gesoute afrigters gaan die vars, nuwe materiaal beslis verwelkom.

Wat gedramatiseerde poësie aanbetref, lewer Louise Lachenicht ’n waardevolle bydrae met haar hoofstuk wat die hele spektrum dek, vanaf die tegniese aspekte soos metrum en beklemtoning, artikulasie en projeksie en ander aspekte wat nodig is om suksesvol te vertolk en voor te dra, tot by keuse van gedig, kleredrag en speeltuimte, om maar ’n paar dinge te noem wat sy aanraak.

Vir die ouers wat nie voorsien dat hulle kinders gaan afrig vir eisteddfods nie, wil ek tog die boek aanbeveel ter wille van die lieflike gedigte wat daarin opgeneem is. Dit kan sorg vir ure se saamlees en saamkuier. Die samesprake is ook heerlike geleenthede vir tuiskonserte, spesiaal vir daardie kinders wat na die dramatiese neig, maar nie noodwendig in die openbaar wil optree nie.

Die boek word uitgegee deur Human & Rousseau, en is tans beskikbaar teen ’n goeie korting by Graffiti Boeke: Eisteddfod-pret 2

 

 

 

Renata Malan se grootste toets

Ek het myself voorgeneem om verby te hou by grieselrige rillers met eksplisiete moordtonele. Maar toe die vyfde in die Renata Malanreeks uit die pen van Madelein Rust onlangs op die rakke verskyn, was dit ’n dilemma, een wat ek nie anders kon hanteer as om te lees nie. Middeleeuse martelmetodes, demoonuitdrywing, hongerige Landrasvarke, rotte… My regterbrein het ek streng opdrag gegee om nie prentjies te maak nie. Ek het wel deeglik gekonsentreer op die skitterende vertelvermoë, taalgebruik en komplekse plot van My naam is Legio.

Renata Malan en haar span moet met haas die sogenaamde kruismoordenaar opspoor, want hy het geen afkoelperiode nie. Sy word egter gekniehalter deur ’n rits probleme: sy sukkel om in die moordenaar se kop te kom, haar verhouding met Stefan, haar vennoot en jarelange vertroueling, raak gekompliseerd en sy verloor kontak met haar pa, George Alfred Hill, wat haar vanuit sy wegkruipplek oppas en raad gee.

Terwyl die spanningslyn snaarstyf span, sorg Stefan se houding en sêgoed vir ’n klein tikkie humor hier en daar, net genoeg om vir ’n oomblik asem te skep. Daardie luukse word die leser egter teen die laaste paar hoofstukke ontneem, wanneer die trauma en spanning byna onhanteerbaar raak.

Dwarsdeur die reeks, spook Renata met die vraag of sy kan, en wil, moor, gegewe die gene wat sy van haar pa oorgeërf het. Sy was al in uitdagende situasies, maar nooit was dit tyd so reg en die rede so perfek, om die sneller te trek nie. Koop gerus die boek en vind uit hoe die dobbelsteen val.

Papierboek beskikbaar by Lapa

Ook as E-Boek beskikbaar met onderstaande skakel:

Oor alles wat beweeg…

In hierdie uitdagende tye waar biblioteke gesluit is en kinders noodgedwonge tuis moet bly en verkies ook tuis moet leer, deel ek graag twee opwindende boeke wat kinders (en grootmense!) vir ure kan besig hou.

My GROOT boek oor treine, motors en lorries wys onder andere hoe treine en motors aanvanklik daar uitgesien het en hoe die moderne wiele lyk. Die spektrum is wyd: alles van passasiersvoertuie, tot plaasvoertuie en voertuie in die boubedryf, om maar ‘n paar te noem. Elke afdeling beslaan twee groot volkleurbladsye, met algemene inligting en byskrifte by elke tipe voertuig.

My GROOT boek oor vliegtuie, bote en ruimtetuie is eweneens propvol interessanthede en leergeleenthede. Wie weet watter hemelliggame ondersoek is met die Juno, die Rosetta en die Magellan?  Die geskiedenis van lugvaart, skeepvaart en ruimtereise word met behulp van die illustrasies en aantekeninge, uitgebeeld.

’n Spesiale bonus is inkleurbladsye agter in elke boek. Die reeks is in 2019 deur Ilaria Barsotti gepubliseer en in Afrikaans vertaal deur Anita van Zyl. Dit word uitgegee deur Human & Rousseau. ’n Móét vir leergierige kinders van alle ouderdomme.

Word ’n virusvegter!

Eloise Macgregor se geillustreerde gids vir gesond bly, Word ’n virusvegter, is ’n handige hulpmiddel vir ouers van kinders van 6 – 9 jaar.  Die koronavirus is die onderwerp van bykans elke gesprek, maar ons kleintjies weet nie noodwendig waaroor die bohaai is nie. Waarom moet hulle hande was vir twintig sekondes? Waarom is hulle skole dalk gesluit en mag hulle nie by maats speel nie?

Die hele kwessie word planmatig verduidelik met behulp van kleurvolle illustrasies. Daar word verduidelik wat ’n virus is, hoe dit versprei en hoe dit jou laat voel. ’n Paar woorde wat dalk nuut is vir klein maats, word verduidelik aan die einde van die boek.

Ek dink die vasvra behoort goeie aftrek te kry. Beantwoord al vier vrae korrek, en jy is ’n virusvegter van formaat!

Die boek is in Afrikaans vertaal deur Fred Pheiffer en word uitgegee deur Human & Rousseau. Die oorspronklike Engelse weergawe is ook geskikbaar, getiteld Be a virus warrior!