Ek moet bieg dat ek nie bewus was daarvan dat ek met ’n klassieke en bekroonde kinderverhaal te doene het toe ek Die hasie van fluweel onder oë gekry het nie. Dit is so lank gelede as 1922 gepubliseer onder die titel The Velveteen Rabbit. Die verhaal is geskryf deur Margery Williams. In 2007 het dit op die National Education Association se lys van die top 100 kinderboeke verskyn. Dit is telkemale vertaal, verwerk en heruitgegee. Ook verfilm en as musiekdrama en dans uitgevoer.

Die hoofkarakter, ’n hasie wat al goed verweerd geraak het, se hartewens was om “Rêrigwaar” te wees. Die oudste speelding in die kinderkamerhasie was ’n hobbelperd wat oud en wys genoeg was om die towerkrag van ’n speelkamer te verstaan. Om “Rêrigwaar” te word, moet iemand jou rêrig liefhê. Daarin lê natuurlik ’n groot stuk wysheid, naamlik dat jou voorkoms nie jou waarde bepaal nie. Die raak ook aan die krag van liefde en die behoefte om te behoort.

Teen die einde van die verhaal gaan jong lesertjies waarskynlik saam met die hasie wil huil, maar dan kom die towerfeë van die kinderkamer tot sy redding en eindig die storie op ’n teer noot met die weersiens tussen die hasie en die seuntjie wat hom rêrig gemaak het.

Die boek beslaan ’n lywige 59 bladsye met nuwe, pragtige illustrasies deur Theodore Key. Ouers gaan dit dalk in meer as een sessie voorlees as dit klein kindertjies is met beperkte aandagspan. Kinders van 8 tot 9 jaar sal dit met gemak self kan lees.