Nuwe titel deur Malene Breytenbach

Sonder waarskuwing, trek die eienaar die mat uit onder die voete van die personeel van Conferences Etcetera deur aan te kondig dat hy die besigheid gaan sluit. Vir Kristin, die geleentheidsbestuurder, is dit ’n dubbele slag, want sy was ook in ’n verhouding met Ray. Wanneer hy haar boonop summier die perseel verbied, is sy in sak en as, sonder liefde óf werk.

Dit is op hierdie punt waar die storielyn my nie heeltemal oortuig nie. Haar terugbons uit die dilemma was vir my te vinnig, gegewe wat sy alles verloor het. Nietemin ’n verhaal wat lekker vloei en die leser, soos in ván die skrywer se vorige werk, laat kuier op Stellenbosch en omstreke. Ook ’n agter-die-skermskykie gee in die modus operandi van ’n geleentheidsbestuursfirma en alles wat kan skeef loop.

Ek dink menige ongetroude leser sal kan droom om ’n held soos Ryno raak te loop. Hy is oopkop, vrygewig en baie lojaal, hoewel hy soms vinnig afleidings maak sonder om vrae te vra. In kontras, is daar ’n paar karakters wat meer twyfelagtig is, wat motiewe en optrede aanbetref. Die paar probleme wat opduik, help beslis om die verhaal te balanseer, gegewe my voorbehoud dat dinge byna te maklik in plek geval het.

Laat u Naam geheilig word

Esté Geldenhuys is ’n bekende in menige Suid-Afrikaanse huise vanweë die baie jare wat sy uitgesaai het op Radio Kansel, en meer onlangs op die televisiekanaal Kruiskyk. Ek het haar persoonlik raakgekuier by ’n damesoggend waar sy as spreker opgetree het. Haar derde boek by Lux Verbi het in Oktober vanjaar op die rakke verskyn.

Haar soeke om die Drie-enige God waarlik te ken, het haar gebring by ’n studie van die Name van God. Die karakter en wese van God word in sy Name geopenbaar. Laat u Naam geheilig word behandel vier en twintig van God se Name, en word verdeel in vier dele. Hoewel die skrywer dit nie beskou as ’n akademiese handboek nie, is dit ’n kosbare studiehulpmiddel vir die leser wat, soos die skrywer, ’n meer persoonlike verhouding met die Vader, Seun en Heilige Gees, nastreef.

Dit is nie ’n boek waardeur ’n leser moet spoedlees nie. Die skrywer beveel tewens aan dat die aangehale skrifgedeeltes byvoorbeeld nie oorgeslaan word nie, maar met aandag gelees word. Die Hebreeuse Name word in die skrifaanhalings ingevoeg vir maklike verwysing. Elke naam se betekenis, voorbeelde uit die Skrif, en die betekenis en toepassing daarvan in die daaglikse lewe, word toegelig. Elke hoofstuk sluit af met ’n gebed, en daar is plek vir persoonlike notas agter in die boek.

Ekself het nog nie die boek deurgewerk van begin tot einde nie, maar ek wil dit solank onder ernstige lesers se aandag bring. Dit kan ’n besondere kersgeskenk wees.

Eendag is nou

Kristel Loots het nou maar eenmaal die vermoë om haar mensekennis en haar kennis van vroue van om en by die sestig jaar, te laat kulmineer in ’n storie wat jou soms laat lag, ander kere hard laat sluk aan die eerlikheid daarvan. Die skrywer verstaan vir seker dat sestig ’n waterskeidingsouderdom is. Dat dit dié ouderdom is wanneer menige vrouens krities, dikwels ontnugterd, na hulself en hulle lewens begin kyk. Selfs al is hulle aansienlik, ryk, oënskynlik gelukkig getroud.

Op bladsy 138 skets hoofkarakter Jacomien haarself in keurig-gekose woorde en kom tot ’n belangrike gevolgtrekking: “Maar wanneer jy sestig jaar oud is, kan jou looks helaas nie alles vir jou doen nie.”

Al waarborg ’n liefdesverhaal ’n gelukkige einde, het die skrywer vernuftig daarin geslaag om my tot diep in die verhaal te laat wonder waar dié geluk uiteindelik gaan lê. By JanKoos, haar man? Of gaan Roelf, wat sy soos ’n sweer in haar binneste ronddra, soos ’n veranderde held weer in haar lewe verskyn? Of gaan haar pad heel anders verloop?

Koop gerus die nuwe Kristel Loots vir jouself as vroeë Kersgeskenk, of gee bietjie kleur aan iemand anders se kerskous!