Die Bybel vir beginnerlesertjies

My eerste Bybel is die titel van ’n nuwe boek op die rakke, geskryf deur Wendy Maartens en lieflike geïllustreer deur Honor Ayres. Daar is vyftien Ou Testamentiese stories, onder andere gunstelinge soos Dawid en die reus Goliat, en Daniël en die leeus. Agt en twintig verhale neem die leser deur die Nuwe Testament, van Jesus se geboorte, tot by die hemelvaart en die koms van die Heilige Gees.

Elke storie, wat ideaal is vir voorlees, is nét lank genoeg om die aandag van ’n redelike jong kleuter enduit te hou. Die teksvers kan uit die Bybel voorgelees word, en die storie sluit telkens af met’n relevante gebed.

Daar is heelwat terme wat gesprek kan uitlok, soos Samaritaan, regter, boelies. Daar is ook lesse soos gehoorsaamheid, geloof en dapperheid wat aangeraak kan word aan die hand van die stories.

Met ‘n duursame hardeband en stewige semi-glans bladsye, behoort dit redelik kinderbestand te wees. Ek skat die ouers gaan die illustrasies net soveel geniet as die kinders.

Hulp met die gewraakte potjie!

Soms gaan dit glo maklik, maar menige mamma het elke stukkie hulp nodig om daardie moeilike doek-na-potjie-fase te oorleef. Geen wonder dus dat daar talle kinderboeke daaroor die lig sien nie. Die nuutste wat ek onder oë gekry het, is Human & Rousseau se “Mag ek in jou doek loer?”. Dit is egter nie ‘n nuwe storie nie. Tewens, hierdie uitgawe is die 10de verjaarsdaguitgawe van die Belg, Guido van Genechten se gewilde boek. Dit is in Afrikaans vertaal deur Philip de Vos.

Soos ons gewoond is met H&R produkte, is die gehalte van die hardebandboek goed, dit is kleurvol en prettig geïllustreer, met flappies wat oplig vir die loerslag. Dit behoort byval te vind by kinders van twee tot vier jaar.

Nog indrukke oor ’n Goeie jaar vir rose

Geniet is nie die korrekte woord om ’n Goeie jaar vir rose te beskryf nie, eerder “beleef”. Soos ek alreeds geblog het, het die boek my vanaf die eerste bladsy geboei. Staal jouself om diepgaande emosies te beleef saam met elkeen van die veelvlakkige karakters. Daar is heelwat teenstellings, soos Lea en Karel se lang getroude lewe teenoor Neil en Lara se huwelik wat nie die mas kon opkom nie. Daar is kinders wat jonk dood is en daar is oudword. Relevante onderwerpe soos gewelddadige verhoudings, drankmisbruik, depressie, die invloed van gebroke huwelike op kinders, alles word verweef in ’n storie wat my nog lank gaan bybly. Ek het een beswaar, wat ek egter voor my eie deur moet lê: ek het soms bietjie klei getrap om tred te hou met hoe die onderskeie families in mekaar steek. Uit nuuskierigheid het ek begin lees op ’n tyd waar ek nie genoemsame kapasiteit gehad het om te konsentreer nie. Ek voel hierdie is ’n boek wat ek gaan bêre om weer te lees, en dit kry volpunte van my af.

’n Goeie jaar vir rose

Santie van der Merwe se sewende roman het sopas die lig gesien. Dit het nie meer as ’n bladsy geverg om te onthou waarom ek versot is op Santie se skryfwerk nie. Sommer vanuit die staanspoor kom gryp dit jou aan die hart, want dit is régte mense met rou emosies wat hier uitgebeeld word.

Ek het nog maar skaars veertig bladsye gelees, want die wêreld wil opsluit nie gaan stilstaan omdat ek nou niks anders sou wou doen as om met die boek iewers te gaan wegkruip nie. Tog is ek reeds verstom oor die knap wyse waarop die skrywer die karakters een vir een aan die leser voorstel, elkeen kompleet met sy eie stem en eie bagasie; hoe grepe van elkeen se voorgeskiedenis laag vir laag afgeskilfer word.

Die sombere gebeure waarmee die verhaal afskop, word gelouter deur die skrywer se puik aanbiedingstyl. Elke hoofstuk het ’n kernwoord of kort sin as opskrif, asook die naam van die karakter wat fokaliseer. Dit verskaf struktuur en verhoog die leesbaarheid.

Ek besef dit is voortydig, maar ek sal baie verbaas wees as ek uiteindelik nie ’n baie goeie punt kan toeken aan ’n Goeie jaar vir rose nie.

Ontmoet Minni se hartsmense

Minni se verhaal begin op ’n nostalgiese noot met die sluit van haar gevestigde onderneming in die middestad van Pretoria. Dit is heel aktueel, gegewe die huidige tendens in Suid-Afrika. Dit is egter nie slegs die verlies van haar tekstielwinkel wat aan Minni se lyf vat nie. Haar verloofde is oorlede in ’n vliegongeluk, en haar eertydse vennoot en beste vriendin, Roda, is getroud en woon nou in Australië. Met geen onmiddellike vooruitsigte vir ‘n nuwe werk nie, besluit sy om plaas toe te gaan, na Roda se ouers toe. As weeskind, het hulle haar as ’n tweede dogter aanvaar.

Dit is dáár waar nie een held nie, maar twee, haar pad kruis. Minni is ’n interessante karakter, vurig en vasbeslote wanneer sy iets aanpak, en opgewasse teen ’n oënskynlike stroewe Duitser en sy suster met ’n skerp tong en onversetlike idees.

Hartsbesit is Anna van Tonder se eerste SuperRomanza. Hoewel die taalgebruik ietwat formeel is, ontwikkel die verhaal goed en oortuig die karakters.